Tramp Azərbaycan və Ermənistana razılaşmadan qabaq xəbərdarlıq edib
ABŞ prezidenti Donald Tramp jurnalist Mark Levinə avqustun 8-də Ağ evdə Azərbaycan və Ermənistan arasında imzalanan razılaşmadan danışıb.
"Münaqişə 34-35 il davam edib. Liderlərlə tanış idim. Dedim ki, ümumiyyətlə, siz niyə döyüşürsünüz? Əgər savaşacaqsınızsa, mən sizinlə ticarət müqaviləsi bağlamayacam. Bu, dəlilikdir", - Tramp müsahibəsində bildirib.
ABŞ prezidentinin sözlərinə görə, hətta Oval kabinetdə Ermənistan baş naziri Nikol Paşinyan və Azərbaycan prezidenti İlham Əliyev sazişin paraflanmasından əvvəl narahatlıq keçirib, onu imzalamaqdan qaçmağa çalışıblar, lakin sonda bir-birilərini qucaqlayaraq təbrik ediblər. "Bunu izləmək, həqiqətən, gözəl idi", - o əlavə edib.
ABŞ prezidenti müsahibə zamanı "Azərbaycan" adını tələffüz etməkdə çətinlik çəkib və Ermənistanın ingiliscə adının əvəzinə "Albaniya" söyləyib.
Rusiya 'Tramp marşrutu'nda Ermənistanı dəstəkləyir – Overçuk
Yerevanın xeyrinədirsə, "Tramp marşrutu" məsələsində Rusiya Ermənistanı dəstəkləyir. Bu barədə jurnalistlərə Rusiya baş nazirinin müavini Aleksey Overçuk bildirib.
"Biz bu məsələni nəzərdən keçiririk. Ermənistan bizim strateji müttəfiqimizdir. Əgər Ermənistan nəyinsə onlar üçün yaxşı olduğuna inanırsa, təbii ki, biz onu dəstəkləyirik", - Overçuk deyib.
O əlavə edib ki, buna baxmayaraq, tərəflərlə aydınlaşdırılmalı olan bəzi nüanslar var.
'Tramp yolu' ilə bağlı ABŞ-Ermənistan birgə şirkəti yaradılır
Ermənistan "Tramp marşrutu" layihəsi üçün Birləşmiş Ştatların iştirakı ilə şirkət qeydiyyatdan keçirməyi planlaşdırır.
"Ermənistanda səhmləri Ermənistan və ABŞ arasında bölüşdürüləcək şirkətin qeydiyyata alınması planlaşdırılır, lakin bu, Birləşmiş Ştatların regionda təhlükəsizlik sferasında iştirakı demək deyil. Bu, İran tərəfini narahat edən əsas məsələlərdən biri idi və hesab edirəm ki, o, aradan qaldırılıb". Bu barədə hazırda İranda səfərdə olan Ermənistan xarici işlər naziri müavini Vaan Kostanyan IRNA agentliyinə müsahibəsində bildirib.
"Mən bura bir mesajla gəlmişəm: Ermənistan İranın mülahizələrini diqqətə alıb və "Tramp yolu" kimi tanınan nəqliyyat bağlantısı layihəsi üzrə ilkin danışıqlarda bu həssas məqamlar nəzərə alınıb", - nazir müavini əlavə edib.
ABŞ-dən Rusiya və İrana "Tramp yolu" xəbərdarlığı
Dövlət Departamentinin sözçüsü Temmi Brüs "Tramp marşrutu"na qarşı çıxanlara xəbərdarlıq edib: "Mən müəyyən hərəkətlərlə bağlı nə edə biləcəyimiz, yaxud edə bilməyəcəyimiz barədə ehtimallar irəli sürməyəcəyəm. Bütün dünya bilir ki, prezident Trampı ciddi qəbul etmək lazımdır. Bu saziş onun üçün vacibdir".