Lavrov Putinin Zelenski ilə görüşməsi üçün şərtləri açıqlayıb
Putin bütün məsələlər hərtərəfli işləndikdən və Ukrayna hakimiyyətinin legitimliyi məsələsi həll olunduqdan sonra Zelenski ilə görüşməyə hazırdır, - Rusiya XİN rəhbəri bildirib.
"Bizim prezidentimiz dəfələrlə deyib ki, o, cənab Zelenski ilə də görüşməyə hazırdır. Ancaq bu, yalnız o halda mümkündür ki, yüksək səviyyədə nəzərdən keçirilməsi tələb olunan bütün məsələlər yaxşı işlənsin, ekspertlər və nazirlər müvafiq tövsiyələr hazırlasınlar", - Lavrov vurğulayıb.
"Və təbii ki, gələcəkdə razılığa gəlinəcəyi təqdirdə, Ukrayna tərəfindən bu razılaşmalara imza atacaq şəxsin legitimliyi məsələsi də həll olunmalıdır", - o əlavə edib.
Zelenskinin Ukrayna prezidenti kimi 5 illik səlahiyyət müddəti 2024-cü il mayın 20-də başa çatıb. Seçkilər ötən il martın 31-də keçirilməli idi, lakin Rusiya təcavüzü başlayandan ölkədə hərbi vəziyyət tətbiq olunduğu üçün ləğv edilib.
Zelenski qoşunları Donbasdan çıxarmaqdan imtina edir
Ukrayna Donbasdan qoşunlarını çıxarmaq və ərazilərin itirilməsini hüquqi olaraq tanımaq niyyətində deyil. Bu barədə Volodimir Zelenski jurnalistlərlə görüşündə bildirib.
"Bunu edə bilmərik", - o, qoşunların Donbasdan çıxarılması ilə bağlı sualı cavablandırarkən deyib. "Məsələ təkcə konstitusiyada deyil. Bu, ölkəmizin sağ qalması məsələsidir, ən güclü müdafiə xətləri, sənaye mərkəzlərinə qədər olan məsafə məsələsidir".
ABŞ prezidenti Donald Tramp daha əvvəl Zelenskinin ərazi məsələləri ilə bağlı açıqlamalarından narazılığını ifadə edib və "bəzi" ərazi mübadiləsinin olacağını vurğulayıb.
Yaxın iki həftəyə hər şey aydın olacaq – Tramp
ABŞ prezidenti Donald Tramp bildirib ki, Ukrayna münaqişəsinin sülh yolu ilə həlli məsələsinə aydınlıq yaxın iki həftə ərzində gələcək. Bu müddətdən sonra Ağ ev rəhbəri məsələyə münasibətini dəyişə bilər.
"Sizə xəbər verəcəm. Düşünürəm ki, iki həftə ərzində bu və ya digər şəkildə biləcəyik. Bundan sonra, ola bilsin, başqa yanaşma seçməli olacağıq", - ABŞ lideri Ukraynada sülhün olub-olmayacağı ilə bağlı sualı cavablandırarkən deyib.