Tramp Zelenskiyə sülh naminə Krımdan və NATO-dan əl çəkməyi təklif edir
ABŞ prezidenti Donald Tramp deyir ki, Ukrayna prezidenti Volodimir Zelenski Krımdan və NATO üzvlüyündən imtina etsə, Rusiya ilə münaqişəni dərhal dayandıra bilər.
"Ukrayna prezidenti Zelenski istəsə, demək olar, dərhal Rusiya ilə müharibəyə son qoya bilər... Hər şeyin necə başladığını xatırlayın. [Barak] Obamanın (12 il əvvəl bir atəş açmadan) verdiyi Krımın qaytarılması və Ukraynanın NATO-ya daxil olması mümkün deyil. Bəzi şeylər heç vaxt dəyişmir", - Tramp "Truth" hesabında yazıb.
Volodimir Zelenski Ağ evə qara kostyumda və qalstuksuz qara köynəkdə gəlib.
"Atəşkəs ideyasını bir səbəbə görə bəyənirəm - o, ölümləri bir-iki həftəyə deyil, dərhal dayandırmağa imkan verir. Amma biz hətta döyüşlər davam edərkən belə sülh sazişi üzərində işləyə bilərik", - Tramp Zelenski ilə danışıqlara başlamazdan əvvəl deyib. "Onlar döyüşməli olurlar. Mən onların dayanmasını istərdim, lakin strategiya baxımından bu, tərəflərdən birini əlverişsiz vəziyyətə sala bilər".
Tramp əlavə edib ki, Putin də münaqişənin bitməsini istəyir.
"Bizə davamlı sülh lazımdır. Ümid edirəm ki, bu, dərhal baş verəcək", - o bildirib.
Zelenski ərazi güzəştləri ilə bağlı suala cavab verməyib. O, münaqişə zamanı seçkilərin keçirilməsi ehtimalını rədd edib.